مصر وجنوب أفريقيا .. عاركة في خمارة واللا دور شطرنج؟ العيلة اللي مفيهاش صايع حقها ضايع.. والشناوي بيعَزّي شوبير..
1- مبروك فوز منتخب مصر على جنوب أفريقيا بهدف، وضمان الصعود لدور الستاشر في كأس الأمم الأفريقية، وتكمل على خير بإذن الله..
2- في البداية فريقين بيلعبوا بعد تعادل المنافسين زيمبايوي وأنجولا، يعني مجموعة مستقرة ومفيش منها أي خوف، مكسب أي طرف معناه الصعود مباشرةً، التعادل برضو معناه صعود الاتنين بنسبة 99% خصوصًا إن يعتبر قصادهم “نُزهة” في الماتش الجاي..
3- الميزة عندنا الجرأة الهجومية بشكل مستمر حتى لو كانت بدون لمسات فنية واضحة، اللي هو انزلوا اهجموا عليهم متخافوش يا رجالة، أنا وإبراهيم في ضهركم.. على طريقة عاركة في خمارة..
4- بس الحقيقة إن الأداء النهارده بعيدًا عن عاركة الخمارة، كان فيه لمحة فنية كويسة كأننا بنبدأ دور شطرنج، ودي حاجة غريبة مش بنشوفها كتير من حسام حسن، لكن لازم نقول إن كان فيه ريحة تدريبية كده أتمنى تستمر وتزيد..
5- لكن الحقيقة كمان إن حسام حسن بيخلينا عصبيين وإحنا قاعدين في آخر الدنيا ع القهوة أو في البيت، ما بالك باللاعيبة اللي شغالين تحت إيده في الملعب؟ تاخد الحماس الزيادة والتهور الأوفر مثال؟ طرد محمد هاني..
6- أما محمد صلاح فهو على العكس تمامًا، مُحترف حقيقي، مستحيل يتأثر بالهمبكة دي، هادي وراسي وواثق، ومهما الوقت عدى من غير ما يعمل حاجة (زي ماتش زيمبابوي كده) هتلاقيه في الآخر يقلب الدنيا لصالحك، وعلى سبيل المثال النهارده لعبة البلن.. بيثبت فيها إن الكورة فَن مش عَن عَن وخناقات ورزع وخَبط..
7- بالمناسبة هدف محمد صلاح النهارده هو الهدف التاسع له في نهائيات كأس الأمم الأفريقية، وبكده تخطى العميد أحمد حسن اللي رصيده 8 أهداف، ورايح يتخطى بإذن الله حسام حسن اللي رصيده في البطولة 11 هدف.. فياريت ياريت يلعب أساسي الماتش الجاي (رغم ضمان الصعود) علشان يحقق الرقم ده من غير نفسنة وأفكار عيال صغيرة..
8- أما طرد محمد هاني فحاجة سخيفة جدًا بصراحة، لاعب واخد إنذار ورايح يلبس فاول عجيبة ملهاش أي لزوم علشان الإنذار التاني والطرد، زي ما قولت في نقطة 5 إن الجهاز الفني كرف عليه وشايف إنه داخل عاركة في خمارة..
9- إبراهيم حسن في الخناقة مع الجهاز الفني لجنوب أفريقيا، لقيته داخل في وسطيهم ولا بيهمه مخلوق، إبراهيم الأبيض هو اللي مسيطنا ومنيم لنا القارة كلها في المغرب من المغرب، هو العضلات في المنتخب.. ناقص لنا مُخ بس ونبقا حاجة كبيرة أوي..
10- إبراهيم حسن بيطبق لمنتخب الفراعنة المثل اللي بيقول العيلة اللي مفيهاش صايع حقها ضايع..
11- أرجع للتغيير اللي حصل في التشكيل الأساسي، واستبعاد حسام عبد المجيد، كان قرار صح جدًا، ومفيش مجاملات هنا خصوصًا إن الولد تايه وله مسؤولية كبيرة جدًا وواضحة في جول زيمبابوي.. كلام هيزعَّل الزملكاوية اللي كانوا عاوزين النايب الوحيد بتاعهم يستمر في التشكيل، بس مصلحة الفرقة ومصر أهم من ميت عقبة، ومن ميت ألف عقبة كمان..
12- الحمد لله إنه في أول الشوط التاني لما حسام حسن نزل إمام عاشور مكان عمر مرموش، مقررش يخرَّج إمام عاشور تاني بعدها بربع ساعة.. طبعًا ده تعليق للهزار، إنما بجد الدفع بإمام كبديل قرار كويس (عكس قرار مشاركته كأساسي أمام زيمبابوي)، وخروج مرموش مينفعش إلا في الحالة اللي إحنا فيها إنك مطرود منك واحد وكُل التبديلات اضطرارية ومضغوطة..
13- محمد الشناوي النهارده مفاجأة الحقيقة، الراجل متألق جدًا بعد فترة من التوهان، وشايل أكتر من هدف مؤكد، فشكرًا لكل اللي استفزوه علشان يعمل كده، وخالص التعازي لكابتن أحمد شوبير والتويتة إياها بتاعته اللي شبه تويتة أكرم حسني في فيلم البدلة (اللي مش واخد باله من الموضوع هيلاقيه في الكومنتات)..
14- زيزو وجوده مهم جدًا رغم سوء التوفيق اللي لازمه في ماتش زيمبابوي، وبصراحة كُنت خايف من عقلية المُدير الفني بس ربنا وفقه في النقطة دي، وإجمالًا فبالقياس بالمباراة الأولى وبقوة المنافسين، فأكيد ـ ونسبيًا ـ فالأداء أمام جنوب أفريقيا أفضل بكتير من الأداء أمام زيمبابوي..
15- بكرر ياريت محمد صلاح يلعب أساسي في ماتش أنجولا رغم ضمان الصعود؛ لأن الرقم القياسي اللي هيوصل له بإذن الله هيكون لصالح الكورة المصرية برضو، والراجل ما شاء الله مش بيعاني من إجهاد ولا ضغط مباريات زي اللاعيبة العاديين، والإصابات لا قدر الله ممكن تحصل في التدريب عادي ربنا يبعدها عن الجميع، ويبعد عننا أفكار النفسنة..
16- شكرًا جدًا للجمهور المغربي، وشكرًا جدًا جدًا لحكم المباراة اللي واضح إن عنده أصول مصرية علشان كده كان جاي معانا حبَّة، وشكرًا جدًا جدًا جدًا والله لصاحب القهوة اللي جايب لنا تليفزيون بايظ شغال صورة بس من غير صوت؛ علشان كده متعذبناش بتعليق علي محمد علي النهارده.. ودي نعمة كبيرة أوي من ربنا، أكبر من نعمة الفوز بالبطولة نفسها والله..
