كتبت نرمين نبيل
كانت نقابة المهن الموسيقية مشغولة جدااا ببوسة راغب علامة بتفاصيلها بردود افعالها بقراراتها بتبريراتها بالجدل اللي وراها واللي حواليها لدرجة انها نسيت او تجاهلت او قررت تتعامى عن تقديم واجب العزاء في رحيل زياد الرحباني لا نقيب راح ولا وفد حضر ولا بيان نعي طلع وكأن اللي مات مش احد اعمدة الموسيقى العربية ولا ابن المدرسة الرحبانية اللي غيرت شكل الفن في العالم العربي كله
زياد الرحباني اللي كان عنده مشروع فني مش بيجامل السوق ولا بيرقص على مزاج الجمهور كان بيقول الكلمة ويقلب الموازين يلحن بوعي ويكتب بموقف بس طبعا ده كله ما يهمش لان زياد مش بتاع مهرجانات ولا مسرح الساحل ولا تريندات التيك توك ولا خناقات اللايفات
والنقابة الظاهر ان انشغالاتها اتغيرت وبقى عندها اولويات جديدة اهمها تحقيق عاجل في البوسة بدل اصدار بيان نعي محترم لفنان بحجم زياد والادهى ان ده بيحصل في بلد المفروض انها قلعة للفن ومفترض ان نقابتها تحمي الذوق وتحترم الرموز مش تدخل في سجال سخيف حوالين حركة عابرة على المسرح وتتناسى حدث بحجم رحيل زياد
مشهد غريب بس مش مفاجئ لان المعايير اتقلبت والادوار اختلت وبقى صوت التفاهة اعلى من كل شيء واهتمام النقابات اكبر بحفلات الساحل من تاريخ المسرح الرحباني الحقيقة ان زياد ماكنش محتاج عزاء ولا بيان هو اكبر من كده وتاريخه بيكفيه وبيشهد له لكن اللي محتاج عزاء فعلا هو حال النقابة والفن لما تبقى البوسة تريند وعزاء زياد الرحبانى صمت
