نقرأ لكم ماكتبه د. أسامة شوقى عن هشام سليم: انسان عاش حياته من عذاب الي عذاب و لم يهنأ له بال

الكل يذكر له الاصل الطيب و الالتزام و الاخلاق العاليه..يرددون مواقفه و اقواله المفعمه بالصدق و الصراحه و الاخلاق..

تابعت كل هذا و جال في خاطري موقف شخصي بيني و بين هشام سليم لا انساه..

موقف تعلمت منه الكثير و فهمت منه جوانب قد لا يعلمها الناس عن شخصيه ذلك الانسان ..

من هواياتي اقتناء الكتب و المراجع النادره و القديمه جدا في مجال التاريخ و الادب و الثقافه..و في يوم تلقيت اتصال تليفوني غامض؛

• الو.. دكتور اسامه شوقي
• ايون يافندم .. مين حضرتك..
• انا هشام سليم .. يا تري عندك وقت نتكلم شويه..

ترددت قليلا !! مين ده هشام سليم؟ اللي بيتكلم بثقه و كأني مفروض اعرفه؟؟
هل هو طبيب زميل؟ ام زوج مريضه؟

شعر هو بترددي و ارتباكي ، فاستطرد بصوت مرح؛

• هشام سليم الممثل يا دكتور .. انت مبتتفرجش علي افلام ولا ايه؟

اجبته بضحك امحي به جهلي بمعرفته بدايه الاتصال؛

• طبعا طبعا .. هو في حد ينسي ” تاخدي بق يا بت يا سعاد”

فضحك بعفويه و رد؛

• ما هي الهبله مرضيتش تاخد بق البيبس و ضيعت فرصه عمرها

بعد تبادل حديث قصير ، كنت منتظراً انه سيطلب ميعاد للكشف علي مريضه او توصيه لحاله !!

ثم استطرد بصوت حاد ؛

• الحقيقه جت سيرتك و انا مع بعض اصحابي و عرفت منهم انك غاوي الكتب النادره و عندك نسخه اصليه من كتاب ديفيد روبرتز عن مصر..

( ديفيد روبرتز رسام و فنان عاش في مصر وقت محمد علي باشا و اصدر كتاب رائع يماثل كتاب وصف مصر مكون من ٣ اجزاء حجم ضخم و ملئ بصور بديعه مرسومه باسلوب ليثوجراف طبع بالحجر و تمثل المناظر و الحياه في مصر ابان ١٨٤٠)
الكتاب نادر جدا و يعد من مقتنيات المتاحف و لا يوجد منه نسخ اصليه كامله الا في بعض متاحف العالم، و يباع بعض صفحات صور منه في متاجر الانتيكات في لندن و اتعمل منه طبعات حديثه و لكن النسخه الاصليه طبعه ليثوجراف حجم كبير و سعرها فلكي..

• مكنتش اعرف يا استاذ هشام انك غاوي كتب نادره في التاريخ و الادب؟

رد بجديه قائلاً؛

• الحقيقه انا باسأل ع الكتاب عشان والدتي.. حكم ماما غاويه جدا اقتناء الكتب النادره عن مصر و بتصرف كل فلوسها في الكلام ده و دايخه علي نسخه من سي ديفيد روبرتز و مش عارفين نوصل له.. و كل ما اروح لندن ، انزل الف و ادور في شارع مكتبات الانتيكات و يادوب الاقي لها صفحه او صوره من الكتاب ، لكن هي نفسها تقتني نسخه الكتاب كامل.. ارجوك يا دكتور لو بتفكر تبيعه انا مستعد لأي طلبات..

توقفت برهه امام مدي حب و اخلاص الابن لوالدته و مدي اهتمامه بالسعي و البحث لتوفير شئ يسعدها

اجبته؛

• اولا انا مبسوط اللي اتعرفت عليك و عرفتك عن قرب.. لكن الحقيقه انا لا افكر في بيع الكتاب و لكن انا اعرف مصادر و مكتبات في العالم ممكن ابحث لك عندهم عن نسخه كامله.. بس اعمل حسابك ان السعر سيكون جامد و خيالي..

فوجئت يرد بثقه و حزم؛

• لا تقلق يا دكتور.. مهما كان التكاليف ، انا مستعد اجيب لماما اللي يسعدها.. انا كنت ناوي اغير العربيه بتاعتي لكن ح انتظر و أأجل الموضوع ده لغايه ما اشوف سعر الكتاب ده كام ؟ و الاهم اجيب لماما اللي هي عايزاه..انا عارف انك دكتور و مشغول و لكن ارجوك تهتم بالموضوع ده عشان خاطري من فضلك..

احسست بنغمه الرجاء في صوته و كأنه طفل يتمني لعبه او متعلق بحاجه جامد قوي..

ابهرني و اذهلني اهتمام الابن بوالدته و اصراره علي تلبيه ما يسعدها..