تزوجها بشروطه وازعجتها شهرته وجمعهما الحب 40 عاما
اتجوزنا من 40 سنة، كنت طالعة من المدرسة وهو ماشي بالعربية فعاكسني هو يعرف بابايا الله يرحمه قعد يشاورلي قولتله انت عايز إيه قالي تعالي أوصلك قولتله لا ماتوصلنيش مايصحش قالي ده أنا اعرف باباكي هوصلك لأول الشارع قولتله لا أول الشارع ولا آخر الشارع خد بعضه ومشي
بليل لقيته عندنا وجه أتقدم لابويا الله يرحمه وبيقوله انه عايزني وعايز يرتبط بيا فابويا قاله دي صغيرة جدًا دي في إعدادية تتجوز إزاي دلوقتي قاله ليك عليا اخليها تكمل دراستها ومش هحوش انها ممكن تدرس ونكمل مشوارنا يعني مع بعض فقاله طب سيبني افكر ففعلًا قالي إيه رأيك يا نيسي أحمد عدوية والحكاية والرواية قولتله اللي أنت شايفه طبعًا أنا في الوقت ده صغيرة مكانش ليا رأي.
كان وقتها مشهور كان ليه أغاني “السح الدح أمبو” و”سلامتها أم حسن” و”ماتكليناش بالمعلقة”
ماقلقتش من شهرته لأني كنت وأنا في المدرسة بغني وبعمل حفلات فمش حاسة أن في رهبة بيني وبينه وحصل النصيب واتجوزنا.
لكن الشهرة كانت مزعجة بالنسبة لي وهو كان صعب جدًا مكانش حد بيشوفني كان بيقولي اللي انت عاوزاه اعملهولك شاوري وانا انفذ لكن لا شغل معايا تنزلي ولا حد يشوفك في شغلي ولا في سفرياتي ولا في المجتمع بتاعي.
وفعلا خلفت محمد أول واحد خلفته وانا في لندن ونزلنا بعدها بسنة جبت وردة، وكان كل سنة يعملنا عيد ميلادنا إحنا التلاتة ويقولنا شوفوا انتوا عايزين مين من فنانين مصر وانا اجيبهولكوا مثلًا عادل إمام محمود عبدالعزيز نور الشريف صباح فريد شوقي كل فنانين مصر.
وبعد زواج استمر أكتر من ٤٠ سنة رحلت ونيسة في مايو ٢٠٢٤ ولحق بها زوجها الفنان أحمد عدوية أمس بعد ٧ شهور فقط..ربنا يرحمهم.
( من صفحة هتجوز )
