راجل طيب صحى من النوم لقى في تُقل في إيده ورجله قاموا عياله قالوا بس دي أكيد جلطة نطلع بيه على مين ؟ أكيد مش المستشفي نطلع بيه على الشيخ فلان عشان يفصل له
وراحوا فعلاً للشيخ، قام فصلّه ( قعد يشرطله بالمشرط في أوردته ودماغه ) اعتقادا منه انه كدا بيفتح السكه للجلطه عشان تخرج بره الجسم وعشان يوجب معاه ويعالج الجلطة العلاج التمام قام مديله حقن كليكسان و ٤ أسبرين و ٤ بلاڤكس -كلها أدوية بتزود سيولة الدم فـحالته اتدهورت ، ولاده النبهاء الفطناء حسوا إن لأ كدا في حاجه غلط فجم لينا المستشفي
طلبناله أشعة مقطعية طلع عنده سكتة دماغية نتيجة نزيف مش جلطة وأدوية السيولة اللي مولانا ادهاله طبعاً نيلت الدنيا وزودت النزيف والراجل دلوقتي فقد النطق ودرجة وعيه مش بتتحسن وإيده ورجله اتشلوا تماماً ومحجوز معانا في الرعايه المركزه
- انا كنت فاكر حكاية التفصيل دي حاجه كانت بتتعمل زمان وبتتحكي دلوقتي عشان نضحك عليها ونقول إن الناس كانوا غلابة وبتاع بس طلعت موجودة لحد دلوقتي سبحان الله
فـخلوا بالكم يا جماعة اللي يتعب يروح لدكتور مايروحش لشيخ ولو روحتوا لشيخ وبعدين رجعتوا لدكتور ماتحاسبوش الدكتور على غلط الشيخ عشان احنا مش ناقصين والله….
*وعموماًكل دا كلام مش مهم أوي.. المهم اللي جاي
-في نوعين من أنواع السكتة الدماغية.. سكتة نتيجة جلطة.. وسكتة نتيجة نزيف.. والاتنين لهم نفس الأعراض اللي هي تقل في اللسان وتقل في ايد ورجل واعوجاج الفم.. إلخ.. مش لازم كل الأعراض دي تكون موجودة.. ممكن عرض واحد او اتنين..
- طبعاً علاج الجلطة عكس علاج النزيف وعلاج النزيف عكس علاج الجلطة بمعني لو المريض عنده سكته دماغيه نتيجه نزيف و اديتله ادويه تزود سيوله الدم فالنزيف هيزيد اكتر و ضرر المخ هيزيد اكتر زي ما حصل مع الراجل الطيب دا فـلازم قبل أي خطوة في العلاج نعمل أشعة مقطعية عشان نشخص النزيف أو نستبعده.. وساعتها لو في جلطة بيبقى قدامنا وقت من ٣ لـ ٥ ساعات ممكن نلحق فيهم العيان وندي علاج يدوّب الجلطة ويرجع العيان زي الأول بالظبط من غير أي مشاكل..
- فـ المفروض إن أول ما الأعراض تظهر تروح المستشفى على طول عشان يتعملك أشعة مقطعية وتتحجز في خلال الـ ٣ ساعات دول بس طبعاً اللي بيحصل في الواقع إن أهل العيان بيسألوا جيرانهم الأول ويدوا المريض أسبوسيد أطفال وبعدين يروحوا للشيخ اللي على أول الشارع يرقيهم ويفصلهم فـبتلاقي العيان ظهرت عليه الأعراض الساعة 9 الصبح مثلاً، وجايلك الساعة 10 بالليل بعد مايبقى خلص لفة أم العروسة!
- الشق التاني وهو النزيف بيبقى أصعب شوية في العلاج. فالوقاية منه أفضل وطبعاً أشهر سبب لنزيف المخ هو الضغط فـحافظوا على ضغطكم.
