الشاعر الكبير عنتر هلال يكتب: اعتراف اخير حبا فى محمد منير

أنا محمد منير..!!

ما تستغربش كتير …؟؟!!

دقق فى لونى..

و مجونى..

وجنونى اللي ما لوش تفسير.

ركز فى الزمن الكسير..

و الشجن المثير..

فتش فى إنتحاب الغٌنا

الغض المرير…حتلقينى أنا….

أنا….. وكتير.

كتير.

كنت ناوي أكتب مسيرتي..

وسيرتي عا الورق..

هههههه..

قال أكتب مذكراتى..

واسيبها ل بناتي…

لو لقيوا وقت بين دواير القلق..

احتمال إن حكاياتى تلًمهم

جايز تقيد النور ل بكره.

بس جت فى دموعى

فكره إني أوصي قلبهم على عمهم

(أيوه أخويا الكبير)

والملك الاخير المهيمن عا البكاره

والحرير

واقولهم

اذكرونى فى…..محمد منير.

أنا محمد منير

نفس العناد والتفرد و الجهاد….نفس الضمير.

والقومه م التعاتير والغصه فى التعابير نفس الغريق المستجير بالحلم..

نفس الغريب المستنير بالأصول..

والمتبت فى حبلك الموصول..

زى الوليد والأم

انا محمد منير ..

وبص فى التصاوير….. أنا اللي الغنا عراب اغترابى

من أول هبت عرابى ل كحكة التحرير

أنا محمد منير..

رغم دا العمر الحرامى للوطن كامل غرامى..

وللتراب جسمى الفقير.