طبيب مصؤى ويعمل في إنجلترا يرد على الإعلامي عمرو أديب: أنا طبيب مصري أعمل خارج البلاد منذ يناير 2020. ومن يومها، ولا مرة اتعرضت للإهانة أو الضـ.ـ ـرب في الطوارئ.. بنشتغل باحترام، بناخد حقوقنا، ومش محتاجين “استغاثة” عشان نعيش بكرامة.. مش بقبض مليون دولار في الشهر، ومرتبي في إنجلترا بيخلص أول كل شهر، لكني متربي على الشغل بإخلاص، لو لا ده، كان زمان أسرتي بتدور على رقم حضرتك تستغيث بيك.
وتابع: زي آلاف الأطباء، سافرنا ندور على: التقدير، المبادئ إننا ننام جنب أولادنا ولو كام مرة في الأسبوع.. لما كنت في مصر، كنت بروح من الإيطالي لليوناني للأمريكي، وبعدين تكليفي في الشرابية.. فيه زمايل لينا حرفيًا مش بيشوفوا بيوتهم، وطبيب ساب منصب مدرس مساعد في قصر العيني وقال: “بنتي نسيت شكلي ومبقتش تعرفني.”..في مصر، حصل معايا إني كنت بكشف على مريض كبير، قلت لابنه: “البقاء لله، والدك توفاه الله.” قفل الباب وقاللي:”عليا الطلاق بابا عايش!”.. المريض محتاج تربية على احترام الطبيب زي ما الدولة قدرت تعلّم الناس احترام الجندي والمحارب، لازم كمان تعلّمهم احترام الطبيب.. و بعد 6 سنين هنا، أقدر أقول:90٪ من المرضى بيعاملوا الطبيب كأنه شبه إله ليه؟ لأنهم اتعلموا يقدّروه.
واضاف: قريب جدًا، الدولة هتضطر تستورد أطباء من الصين، بعد ما الأطباء المصريين بقوا في الإمارات وقطر والكويت.. مش عشان الفلوس بس، لأ… علشان الاحترام والتقدير.. إحنا مش عاوزين حاجة.. بس عاوزين بلدنا تعاملنا زي ما تركي آل الشيخ بيعاملك.
