إحنا مصريين وصناع التاريخ ..
والحضارة الإنسانية
أمهاتنا اللى جابونا
م الحضارة الفرعونية ..
للحضارة الإسلامية
علمونا القيم والإنسانية
علمونا ننسى بسهولة الأذيه
حذرونا م التعدى ع الحقوق والمحارم
قالوا يا بخته اللى بات مظلوم ولا باتش ظالم
بس برضو علمونا .. امتى نقسى
ع اللى قدروا يعيشونا .. فى المآسى
فوق يا مصري .. واوعى تنسى
أيوه مطلوب .. تبقى قاسى
ع اللى تاجروا بالرايات الإسلامية
واللى جاهروا بالنوايا الأجرامية
واما حكموا .. هددونا وخوفونا
وكانوا عاوزين يحرقونا
لولا ستر الله علينا .. والقيادة العسكرية
كانوا هيبيعوا القناة .. بالصكوك الإسلامية
اوعوا تنسوا ان الجماعة الإرهابية
كانوا بيتاجروا بتاريخنا وبأثارنا وبقنالنا
باعوا مستقبل عيالنا للدويلة القطرية واردوغان
والرئيس اللى كان .. بيهدى أرضك للسودان
وبيهدى سينا الغنية ..
أجمل هدية .. للدواعش .. والغزاوية
اوعى تنسى جنودك الصايمين وتارهم
لما كان الموت .. فطارهم
إغتالوهم .. بدون ضمير
علشان يقيلوا فيها .. المشير
هربوا البنزين على غزة
وسابوا الشعب عليه طوابير
واما خطفوا جنودنا فى سينا بدون تفسير
طلع رئيسهم .. قال ايه حزين
يقول حريصين .. ع الخاطفين والمخطوفين
اوعى تنسى كمان يا مصرى يا أمير
إعتصام رابعة الشهير
والشباب اللى اغتالوهم
واللى فضلوا يعذبوهم
والقناصة فى التحرير
حرقوا القوب .. بكوا العيون
خلوا بيوتنا علينا سجون
اوعى تنسى ليالى سوده
حرّموا فيها الأمان
لما ركبنا الحديد .. ع الشبابيك والببان
واوعى تنسى يوم بليلته عيشته ضلمه للصباح
واما أبوك باع اللى حيلته .. واشترى حتة سلاح
لجل يحمى بيها عيلته
اوعوا تنسوا لما مصر شوهوها وقللوها
وكرهوا أولادها فيها .. وضحكوا العالم عليها
إجتماع سرى … بيتذاع ع الهوا
برلمان ضعفان .. مريض ومالوش دوا
وتسخر منا دول عربية وغربية
وقطع الكلمة على الرئيس فى القمة الأفريقية
وف روسيا يستقبلوه .. برئيس وحدة محلية
والاعلان الدستوري .. الدكتاتورى
والتهديد بالجيوش … والوحوش
وطائر النهضة الفنكوش
وحلق حوش ع الدبلوماسية المصرية
مهزلة العصر
لما استضافوا رئيس إيران على أرض مصر
وأحمد نجاد رفع إيديه … بعلامة النصر
إوعوا تنسوا الكدابين ..اللى خانوا عهود بلدنا
فكروا بيهم ولادنا .. فكروا احفادنا بيهم
خلوا صورة حزننا .. قدام عينيهم
واوعوا تنسوا فى الزمان ده .. وأى عصر
الرجال .. اللى الشهامة فى دمهم
واللى حطوا عمرهم .. على كفهم
واللى جادوا بالحياة .. على يدهم
اللى ماتوا ..
اللى ماتوا عشان نعيش .. وتبقى مصر
اوعوا تنسوا .. اوعوا تنسوا
