صوفيا لورين وريتا هيوارث مبيعرفوش يتدلعوا
عمر الشريف وحواره مع هالة سرحان عن عدم زواجه من غير مصرية
أنا معرفتش أتجوز أبداً بعد لما سيبت مصر، طبعاً قابلت أجمل السيدات لكن أسلوب الكلام بتاعهم والقعدة بتاعتهم ماتكيفنيش، مقدرش أقعد معاهم.
- يعني لما بقيت عمر الشريف النجم العالمي المشهور وطبعاً كل نجمات هوليوود وكل جميلات العالم والستات كلها بتتقربلك والأثرياء والأغنياء ماعجبتكش ولا واحدة؟
= ولا واحدة، مابعرفش أتعامل معاهم، يعني ممكن أتغزل في واحدة فيهم لكن قصة حب لأ، أنا من سنة 1998 عايش لوحدي.
- يعني مفيش قصة حب وأنت عايز تتجوز وتعيش وتبقى هي دي أسرتك؟
= لأ أبداً ولأسباب متعددة .. أول سبب أن طارق ابني كان معايا لأن فاتن حمامة قالتلي خده معاك عشان هتوديه مدارس أحسن توديه إنجلترا أو أمريكا زي ما تحب
وبعدين ماحبتش أن ابني طارق يعيش تجربة مرات الأب، لذلك مدخلتش ست في البيت أبداً وبعدين اتعودت
تاني حاجة لما قابلت سيدات حلوين لكن أسلوبهم معجبنيش، القعدة متعجبنيش يعني أكون قاعد معاها وأنا زهقان، مفيش أسلوب الدلع بتاعنا .. فيه حاجات كده عند المصريات بتعجبني زي المغازلة والدلع والشخلعة الحاجات دي كلها بتعجبني أوي.
- ماعجبتكش ولا نجمة عالمية ولا صوفيا لورين ولا ريتا هيوارث ولا كل جميلات العالم .. مابيعرفوش يتدلعوا؟
= لأ مابيعرفوش .. أسلوبهم مختلف، وعقليتهم مختلفة.
