ناس كتير متعرفش قصة “سبتة ومليلية” وليه مدينة مغربية تبقا تحت حكم الاسبان وليه اصلا دخلوا سباحة؟
اولا : قصة سبتة ومليلية ..القصة بدأت كما وصفها “لسان الدين بن الخطيب” من الاندلس، لما قال “وصاح فوق كل غصن ديك”عشان يوصف ملوك الطوائف لما حاربوا بعض في الاندلس في القرن ال١٥ في فترة ضعف حكم بنو نصر او بنو الاحمر لغرناطة، في نفس الوقت على الناحية التانية مملكة “ارجون” ومملكة “قشتالة” اتحدوا، لما امير ده اتجوز اميرة دي، فيرناندو وايزابيلا، ومعاها بدأت حروب الاسترداد اللي انتهت بإن “ابو عبد الله الصغير” آخر ملوك بنو الاحمر سلم غرناطة لكاثوليك اوروبا ومشي.
بعد تسليم غرناطة، اتجهت انظار اسبانيا والبرتغال لسبتة ومليلية بتوجيه من الكرسي الرسولي، بسبب موقعها الجغرافي وكونها بوابة بين المتوسط والاطلسي، ولكون “سبتة” تحديدا كانت نقطة انطلاق “طارق بن زياد” لفتح الاندلس، ودائما كانت تحت سيطرة المسلمين، آخرهم مملكة “فاس”، فقررت البرتغال سنة ١٤١٠م تحتل سبتة بقيادة الملك جواو الاول، وسنة ١٤٩٧م تقرر اسبانيا تحتل مليلية، سبتة فضلت تحت حكم البرتغال لحد سنة ١٥٨٠م، لما اسبانيا بتقرر تضم البرتغال نفسها بكل ممتلكاتها، وبقت سبتة ومليلية اسبانية.
طول الفترة دي المغرب حاولت تستعيدها اكتر من مرة.سنة ١٦٧٢م بيوصل لحكم المغرب سلطان اسمه “المولى اسماعيل”، وبيقرر انه يحرر ثغور المغرب من ايد الايبيريين اللي هما الاسبان، بس هيعمل كدة ازاي؟
بيكون واحد من اضخم الجيوش في الفترة دي وهو جيش البخاري، مكون رأسا من العبيد، الفكرة انه لاحظ ان الرعية بيتكاثروا في اقتناء الاسرى، فأصدر قانون بمنع الرعية من تملك الرقيق، ولم كل الرقيق دول بعد ما دفع فلوسهم لاصحابها وعمل منهم الجيش، دربهم وسلحهم واسكنهم في مكناس وعين عليهم قاضي، وفجأة بقا يمكن جيش قوامه ١٥٠ الف.بدأ يحرر الثغور، العرائش واصيلة والمهدية وطنجة، بدأ يتوسع، وصل لنهر السنغال في افريقيا، ومكنش فاضله غير سبتة بس، حاصرها ٣٣ سنة، لكن سبتة كانت محصنة وخنادقها عميقة، المدينة كانت محصنة ب٣ خطوط دفاعية، وراهم “بلازا دي ارماس” وده فناء واسع فيه ٣٠ مدفع، وراه خندق فوقيه جسر بيتفنح ويتقفل وراه حصن تاني، الموضوع كان صعب.
بس سنة ١٦٩٥م في قلب الضباب، بينجح الجيش انه يقتحم البلازا دي ويسيطر عليها، وكان على وشك تحرير المدينة الا ان هجوم مباغت ادى لتراجعه، واستمر الحصار لحد ١٧٢٧م حتى وفاته وهوا عنده ٨١ سنة، بسبب حزنه انه مبقاش يعرف يركب الخيل زي الاول، عشان جاله خراج في البطن، واسباب فشل الحصار كتير منها ان مفيش اسطول يعزل سبتة عن اسبانيا.
المهم بتتعدد المحاولات تاني لتحريرها، آخرهم سنة ١٩٢١م، لما عبد الكريم الخطابي عمل ثورة الريف في شمال المغرب ضد الحكم الاسباني، وانشأ جمهورية الريف وعاصمتها أجدير، لحد ما قررت اسبانيا وفرنسا يحلوا الجمهورية دي بقيادة المارشال الريفي “أمزيان، وعملوا واحد من اسوأ الهجوم الكيماوي في تاريخ المغرب، لما الطيارات الاسبانية رمت فوق الريف غاز الخردل، ومع تشديد الحصار اضطر “الخطابي” انه يستسلم، وعاش في القاهرة تحديدا في منطقة الدقي، وتوفي سنة ١٩٦٣م ودفن في القاهرة.
سنة ١٩٥٦م استقلت المغرب عن اسبانيا، لكن رفضت اسبانيا التخلي عن جيب “سبتة ومليلية”، لانها جزء من “ساحات السيادة”، الاسبانية، الجزر والاراضي اللي ناحية المغرب لكن تحت حكم اسبانيا، التعامل مع سبتة بسياسة الاحلال، استبدال المغاربة بشعوب تانية، على سبيل المثال الهندوس، والاوروبيين، وغيرهم، ثم سنة ١٩٩٥م اصبحت سبتة ذات حكم ذاتي.
اخيرا: ليه دخلوا سباحة رغم انها جزء من الارض؟الوضع ان فيه مدينة اسمها “الفنيدق” بينها وبين سبتة امتار وسياج حديدي، لكن الفنيدق مغربية وسبتة اسبانية، ولان القانون الاسباني الجديد بيحظر الترحيل القسري للمهاجرين عن طريق البحر او السباحة، يعني لو حد جي من البحر ميرجعهوش على طول، فالامر انهم نزلوا البحر وعاموا شوية ودخلوا عن طريق البحر، وبكدة ينطبق عليهم القانون ويدخلوا اسبانيا، والنتيجة ٤٩ الف مهاجر غير نظامي دخلوا سبتة ويمكن اكتر، بالاضافة ان عدد اللي ماتوا ٣٤ حالة وفاة.
وهيا دي قصة سبتة ومليلية آخر جيوب الحملات الصليبية…..
