إعلان ڤودافون اعلان تافه مكرر نمطي مفيهوش ابداع ب ٢ جنيه و عبارة عن حشو نجوم و اهدار مئات الملايين بلا اي معني او عائد مدروس!!
الاعلان ده هو حرفيا اعادة اعلان رمضان ٢٠١٥ بتاع “كان فين زمن الشقاوة ده” اللي كان باردو ٦٠٠ مشهد ب ٦٠٠ فنان و كل مشهد فيه فنان بيكلم فنان اخر قريب ليه يقوله انه واحشه!!!
نسخة طبق الاصل!!! غالبا ال creative director دخل حرفيا جاب ال story board بتاعة ٢٠١٥ و غير الممثلين و غير ال jingle بواحدة ابوخ و عمل نفس الاعلان!!! افلاس مرعب!!!
لكن الحقيقة نقطة ضوء واحدة في الاعلان ده اديتو طعم و روح و ريحة هو ظهور الجميلة الخطيرة المبدعة الاسطورة عبلة كامل في اخر الاعلان بعد غياب طوييييييل عن الظهور!!!
الحقيقة انبسطت جدا جدا لما شوفتها بوشها السمح و ضحكتها الحقيقية…….
وحشتينا كتير يا ام عبد الوهاب…….وحشتينا كتير يا فاطمة يا كشري……..وحشتينا كتير يا خالتي فرنسا……
اعظم من انجبت الدراما المصرية علي الاطلاق، اسطورة في التمثيل لن تتكرر و لن يجود الزمان بمثلها!!
هي ابو تريكة بتاعة التمثيل!!! ضيف علي كدة انها علي المستوى الشخصي، شخصية غاية في الخجل و التواضع و البساطة……
انا عمري ماشتغلتش معاها بس شوفتها مرتين في الاستديوهات.
نورتي الشاشة يا ملكة الشاشة يا اسطورة الدراما المصرية!
