من اكتر الحاجات اللي بتشدني في مجتمعات الغرب مش فكرة الرفاهية ولا المباني الحلوة بس.
لكن فكرة ان كل واحد عارف حدوده كويس ماحدش حاشر نفسه في حياة حد.
ماحدش منصب نفسه قاضي او وصي على اختيارات غيره فيه مساحة شخصية محترمة بتحسسك انك انسان من حقك تعيش يومك من غير ما تبقى تحت المجهر تمشي في الشارع تلاقي كل واحد مركز في طريقه وفي يومه.
مشغول بحياته هو مش بحياة غيره مش باصص مين لابس ايه ومين بياكل ايه ومين بيتصور ومين قاعد مع مين.
والاجمل ان حب البلد هناك مش مجرد كلام بيتقال وشعارات وقت المناسبات لكن سلوك يومي بيتشاف في التفاصيل الصغيرة.
ماحدش بيرمي قمامة في الشارع كله ملتزم باشارة المرور حتى لو الطريق فاضي كله بيحترم الطابور كله بيحافظ على المكان العام كأنه بيته تحس ان فيه فهم بسيط لكنه عميق.
الشارع مش ملكي لوحدي والرصيف مش حقي انا بس وحرية حركتي لازم تراعي حرية وراحة غيري فتلاقي الدنيا منظمة اماكن واضحة للمشي ومسارات للمشاة والعجل.
ومراعاة لاحتياجات كبار السن وذوي الاعاقة والحيوانات الاليفه وفيه رصيف وممشي في كل مكان ومشهد عام فيه قدر من النظام يخليك مرتاح نفسيا حتى وانت ماشي من غير هدف.
ومن اكتر الحاجات المريحة كمان ان مافيش حالة استعراض مستمرة.
ماحدش عايش علشان يثبت للناس هو معاه ايه او لابس ماركة بكام او راكب عربية تمنها قد ايه.
قيمة الانسان مش متقاسة بالمقتنيات ولا بحجم الصرف ولا بشكل الحياة المتصدر على السوشيال ميديا.
كل واحد عايش على قد امكانياته بشكل طبيعي جدا ومن غير خجل او ضغط اجتماعي مستمر يخليه داخل سباق مرهق على قد فلوسك تقدر تنبسط وتعيش وتستمتع وتعمل ذكريات حلوة من غير ما تحس انك لازم تمثل مستوى اجتماعي مش بتاعك او تدخل نفسك في مقارنات فيه قبول لفكرة ان الحياة مش منافسة مين ظاهر اغنى ومين قادر يصرف اكتر.
لكن الاهم انك مرتاح وعارف تعيش بالي يناسبك من غير استعراض ولا احكام جاهزة من الناس.
وكمان من الحاجات اللي تستحق الاحترام فعلا ان الناس هناك عندها توازن واضح بين الشغل والحياة بيشتغلوا ويجتهدوا لكن في نفس الوقت بيعرفوا يعيشوا وينبسطوا بالمتاح مش مستنيين مستوى خرافي علشان يبدأوا يستمتعوا بحياتهم ولا عايشين في ضغط دائم ان لازم كل حاجة تبقى اكبر واغلى واحسن قدام الناس بيشتروا على قد احتياجاتهم الحقيقية مش على قد الرغبة في الاستعراض واشياء مالهاش لازمة ولان اغلب الاشياء متاحة ومتوفرة ومفيش احساس دائم بالندرة او الحرمان.
فالشراء بيبقى قرار طبيعي مش تعويض نفسي او سباق اجتماعي وفيه احترام كبير جدا للخصوصية.
مافيش حد بيصور حد خلسة في الشارع علشان ينزله محتوى او مادة للسخرية او الفضول فكرة ان انسان يبقى مادة للتصوير من غير اذنه تعتبر تعدي واضح على خصوصيته.
وده بيخلي كل واحد حاسس بامان اكبر في المساحة العامة حتى التفاصيل الصغيرة مريحة اغلب المطاعم بتحط المنيو والاسعار بره بشكل واضح تقف براحتك تشوف الاسعار وتقرر تدخل او تمشي من غير اي حرج من غير ضغط ولا احراج ولا احساس انك لازم تشتري علشان شكلك قدام الناس لما الحياة تبقى منظمة وواضحة ومتاحة.
الناس تلقائيا بتبقى اهدى اقل توتر واكثر اكتفاء لانها مش مضطرة كل يوم تخوض معركة لاثبات شيء لاحد.
ومن التفاصيل اللي بتفرق جدا كمان علاقتهم بالطبيعة.
الشجر مالي الشوارع والطرق والحدائق ومتساب في مساحته الطبيعية بشكل مريح للعين والنفس مش كل حاجة لازم تتقص وتتقلم لحد ما تفقد روحها الخضرة حوالين الناس بتدي احساس بالهدوء والراحة وتخلي حتى المشي العادي تجربة لطيفة المدينة نفسها بتحسها متنفس مش مجرد اسمنت ومباني وزحام.
وكمان من اكتر الحاجات الملفتة فكرة التعامل الطبيعي جدا مع الشهرة والمناصب.
ممكن تكون قاعد في كافيه وتلاقي جنبك مسؤول كبير او وزير او شخصية مشهوره قاعد بشكل عادي مع اصحابه او عيلته من غير زحمة من غير اقتحام لمساحته الشخصية.
من غير سباق صور وسيلفي ولا حد بيصور خلسة علشان ينزل المحتوى المعتاد.
فيه وعي واضح ان الشخص مهما كان منصبه او شهرته يظل انسان من حقه يعيش لحظاته الخاصة في سلام ويمكن ده جزء مهم من التحضر الحقيقي..
انك تعرف الفرق بين الاعجاب وبين التعدي وبين الفضول وبين انتهاك الخصوصية لما المجتمع يحترم الحدود والمساحات الشخصية بالشكل ده.
الحياة نفسها بتبقى اخف واهدي وكمان من الحاجات اللي لفتت نظري ان رغم النظام والهدوء والاحساس بالامان لكن مافيش مجتمع مثالي لما زادت بعض حوادث السرقة بقوا ينبهوا الناس بشكل واضح في المترو او الشوارع.
خلو بالكم من الحرامية او يحذروا الناس من النشالين في الاماكن المزدحمة.
وده شيء احترمته جدا انهم ماعندهمش فكرة التجميل الكاذب او انكار المشكلة علشان يحافظوا على صورة مثالية لما تظهر مشكلة بيتكلموا عنها بشكل مباشر وينبهوا الناس ويتعاملوا معاها بوضوح.
الاعتراف بالمشكلة ومحاولة التعامل معاها افضل بكتير من تجاهلها او التظاهر انها غير موجودة.
وده برضه جزء من الوعي والمسؤولية ان المجتمع مش معناه ان كل شيء كامل، لكن معناه وجود نظام وقدرة على المواجهة والتعامل مع العيوب بشكل عملي وواضح قانون بيحترم ومفعل والكل امامه سواسيه.
