الإعلامى القدير مهندس حسام صالح يكتب:كتبت اهداف لنفسك.. طب إيه بقى!

الحياة دايرة.. مش هتقف ولا مستنية اهدافك..

يبقى يلزمنا شوية قياس عشان نعرف ننفذ ونقيس هل بنحقق اهدافنا فعلا.. نتفق الأول.. إننا هنعمل وحدة القياس هي الأسبوع … مش يوم و مش شهر

لو كنت كتبت أهدافك الشخصية و المجتمعية و العملية – بوستات فاتت – يبقى كل المطلوب دلوقتى انك توفر 100 دقيقة كل أسبوع بهدف المراجعة و الحساب و تظبيط الأمور

اول الاسبوع تقعد مع نفسك 30 دقيقة و تكتب (تكتب مش تفتكر) الأهداف و قصاد كل هدف تكتب تاريخ الاسبوع وتحط لنفسك أنشطة الاسبوع ده في طريق تحقيق الهدف الفلاني.. اكتب مهما كان الأمر صغير (مثال.. هاكلم فلان – هاجتمع مع فلان) – بالشكل ده يتجمع عندك كل ما تريد عمله الاسبوع في بدايته . اكتب جنب كل نشاط من الأنشطة ناوي تعمله يوم ايه (الاثنين.. الأربعاء.. وهكذا).. كده بقى قدامك تخطيط مبدئي للأسبوع بتاعك .. ممكن تكتبه في ورقة أو في اجنده ورقية أو على اجندة الموبايل كل حاجة في اليوم بتاعها.. طبعا فيه أمور اعتيادية بتعملها كل يوم هتفضل بتعملها لأن أعمالك الاعتيادية دي كنت بتعملها كده كده.. قبل ما تكتب أهداف و تنظم و تنوي تخطط و تحسن من حياتك. كده 30 دقيقة مرة واحدة في الأسبوع.

بعد كده … كل يوم بقي قبل ما تنام خد لك 10 دقايق تشوف اليوم اللي بيخلص ده كان عليك ايه فيه وعملت ايه و معملتش ايه.. ليه في آخر اليوم مش أوله عشان احنا بنقيس و بنقيم بعد زحمة اليوم.. انت وانا نستاهل من نفسنا عشر دقايق كل يوم… يوميا.. يعني سبع ايام في الأسبوع لأن أهدافك مش بتاخد ويك اند كده بقوا مرة واحدة 30 دقيقة في الأسبوع و10 دقايق كل يوم.. يعني 100 دقيقة كل الأسبوع

دلوقتي هيكون عندك ورقة كل أسبوع فيها أنشطة الاسبوع وعندك تقييم انت بتتصرف ازاي قدام أهدافك. هل أنت بتشتغل لتحقيقهم؟؟ و لا هم مجرد أمنيات وآمال وا حلام عمال تقول عنها انها أهدافك!!

هافكرك انت اللي كتبت الأهداف (تغيرها أو تعدلها) – انت اللي ماسك الورقة و بتكتب أنشطة الاسبوع (انت المتحكم) – انت اللي بتعمل التقييم اليومي (انت اللي ماسك القياس يعني)…. يعني انت و بس هتتحاسب مع انت .. لا فيها ظروف و لا فيه اصل فلان أو علان.. و بنقول أسبوعية لأن دي أقل وحدة عملية تقريبا نقدر نشتغل على أنها متكررة.

الكلام ده معناه انك كل 3 شهور.. عندك 13 ورقة ل 13 اسبوع. تقعد معاهم تعمل المراجعة الربع سنوية مع نفسك وبنفسك و لنفسك.. و ده ياسيدي اللي بيسموه في الشركات Quarter Review..

أنا و انت برضه هنعمل كوارتر ريفيو لو حافظت على 100 دقيقة كل أسبوع هتلاقيها سهلة.. مجرد روتين تتعود عليه ينظم لك الدنيا تماما (روتين كلمة كويسة بالمناسبة و معناها الحقيقي النظام من أجل نتائج مميزة)
يجعل أسابيعكم كلها نشاط وحيوية وإنجاز و رضا
ابتسموا .. تفاءلوا بالله