عارفين يعني ايه حد مشهور او زي ما بيقولوا شخصيه عامه
يعني تسمع تعليقات تجيب الضغط وتسكت لأنك مشهور ميصحش ترد
يعني تسمح لحد يدخلك الجنه والنار علي مزاج أهله عشان هو حابب كده وهو في الأصل ميعرفش اساسا حتي القبله منين
يعني تتسب بأمك وأبوك واللي خلفوك ولازم تكتب ربنا يسامحك ..لان لو غلطت الناس مش هتسامحك لكن هتسامح اللي شتمك
يعني طول الوقت علي مباحث الإنترنت والأقسام عشان ضميرك يبقي مرتاح ونومة أبوك مرتاح في قبره عشان اتشتم من غير ذنب
يعني ابنك يكسر عليه سواق ميكروباص بلطجي ويكسرله عربيته ويغلط فيه وفي اللي خلفوه وأول ما يشوفني في القسم يقولي اه ما أنتي معروفه بقي هتيجوا عليا وتظلموني واضطر اقنع ابني أننا لازم نسامح عشان احنا رفت شخصيه عامه
يعني لازم حياتي تبقي معروفه سني وجوازي وطلاقي وولادي وعندنا ايه وبنعمل ايه ..عشان مينفعش ندارى علي شمعتنا لأنها شمعه الشارع كله
يعني تنام مقهور من كميه الطلم والإشاعات ولو بس كتبت حسبي الله ونعم الوكيل الناس تدخل تقولك عيب يا أستاذه انتي اكبر من كده
يعني تمشي في الشارع لو كسرت إشاره تتبهدل وتتصور ويطلعوك المسرح لأنك زفت شخصيه عامه قدوه يا جماعه ممنوع الغلط
ياخدوا فيديوهاتك وشغلك ويشتموك عشان يعملوا هما نفسهم شغل بيك وتلاقي نفسك زي قضبان السكه الحديد واخدين وشك رايح جاي
ممنوع تجري زي العيال في الشارع ولا تأكل ذره وترمس في الشارع ولا تغني بصوت عالي وانت راكب عربيتك
انت مراقب من البصاصين صيادين المشهورين يا أفندم اتنيل خش نام
مساحه حريتك الوحيده اوضه نومك أربع حيطان كلم نفسك فيهم براحتك واضحك وعيط براحتك وصرخ بس لو صوتك طلع بره مش مسئولين لان هيسجلولك صوتك ويقولوا الشهره جننته
خد بقي عندك كل رسايل وأنواع التهديد النفسي والمعنوي ليك ولا سرتك وكل أنواع الابتزاز …ولما ندخل بالقانون يقولك ايوا ماانت طبعا شخصيه عامه لازم تكون فوق القانون
دي حياتنا يا جماعه اللي عايز شهره يتفضل
اللي عايز يتمرمط قصاد كل لحظه شهره يتفضل
اللي مخليني متحمله كل ده حاجه واحده
كلامي مع ربنا وطبطبته عليا وعلي أسرتي
فكرت كتير اعتزل العمل كله واكتفي برعايتي لأسرتي وهواياتي المفضله ..لكن الجميع رفضوا واولهم أمي الداعمه الأولي ليه ..دايما تقولي شغلك ده حياتك لآخر نفس في عمرك
ووعدتها إني بطلت أسيب حقي وحق ولادي ..وأي مساس بينا مش هسكت وكله بحسابه
