الفنانة سحر نوح تعترف وتفضفض معكم: انا من الشخصيات إلي بتعيش علي الذكريات

بحب الصور القديمه ومابهتمش بشكلي فيها ايه المهم بالنسبالي لما بشوفها برجع بذاكرتي وافتكر اللحظه
بحب الجوابات الي مكتوبه بخط ايد الأحباب الي راحو
بحب اروح ازور الاماكن الي عشت فيها
بحب اطمن علي أصدقاء طفولتي وبفتخر بكل حد فيهم وصل لمكانه حلوه وسعيد في حياته
اكبر واغلي كنز عندي ورقه بخط ايد ابويا وشوية شعر من راسه وساعات قديمه بايظه ماعرفتش اصلحها بس كفايه انها في يوم لمست ايده بفتح ابوسهم واحاول اشم الي فاضل فيهم من ريحته
توكه قماش باستك من بتوع مامتي وسبحه خيطها داب شايلاها في عليه
بونيه جدتي وشوية شعر من راسها وحلق كانت لابساه لاخر لحظه في حياتها لما الدنيا بتضيق بيه بفتح البونيه الي فيه شوية الشعر ابوسهم كإني ببوس راسها والبس الحلق وابص للسما واقولها ادعيلي
احلي هدايا بالنسبالي لما حد يبعتلي صوره لابويا او امي او اي حد من احبابي الي رحلوا
اسكندريه بالنسبالي هي كل ذكريات طفولتي البريئه التمشيه علي البحر واكل جيلاتي عزه ومشمشيه بالايس كريم وعصير مانجه من صابر وساندوتشات الكبده من محطة الرمل والزفريون في ابو قير والرتسا باللمون وريحة اليود الي بتفكرني بريحة بيت امي والايام البسيطه الطيبه
من اكتر الحاجات الي بتإلمني نفسيا ان ذكرياتي تتهد
بيتنا القديم اتهد وبقي عماره والشارع مابقاش زي زمان
اسكندريه مابقتش اسكندريه
الصور الي في خيالي مابقاش مطابقه لواقع قبيح مش قادره اشوفه ولا اتعامل معاه والناس الحلوه راحت السما والي فاضلي شوية صور الحمد لله ان ماحدش حايطمع فيها ولا يمكن تتآمم وحاتفضل ذكرياتي جوايا الملمها واروي بيها عطش الي باقي من العمر.