كنا زمان نصحى يوم شم النسيم على زحمة في البيت وريحة فسيخ طالعة من المطبخ وصوت أمي بتزعق عشان البصل الأخضر وصوت أبوي بيحضر السبت وصوتنا احنا بنتخانق مين هيشيل الترمس ومين هيشيل الكولا وننزل جري على الجنينة او على النيل ونفرش وناكل ونلعب ونروح آخر اليوم مهدودين بس مبسوطين.
حاليا لما تكبر وتقرا تفهم ان اليوم ده مش لعبة عيال ده تاريخ ماشي على رجليه ده أقدم عيد في الدنيا بدأه المصريين القدماء من أكتر من خمسة آلاف سنة وكان اسمه شمو يعني بعث الحياة وكان مرتبط بالربيع والزرع والحصاد والشمس اللي بتتعامد على المعابد وكان يوم اجازة رسمي لكل الناس من الملك للفلاح يطلعوا يحتفلوا بالحياة الجديدة وياكلوا أكل له معنى ورمزية البيض الملون رمز الخلق والبعث وكانوا يكتبوا عليه أمنياتهم ويعلقوه على الشجر والسمك المملح رمز الخير والرزق اللي جاي من النيل.
والبصل الأخضر رمز الشفاء وطرد الشر والخس رمز الخصوبة والنمو والترمس والملانة تسالي القعدة والونس والعادات دي عدت آلاف السنين ووصلت لنا زي ما هي كأنها محفورة في دمنا.
كل سنة في نفس اليوم البلد كلها بتتحول لجنينة كبيرة الشوارع فاضية والجناين مليانة والسبت هو هو والفسيخ هو هو والبصل هو هو والخناقة على مكان القعدة هي هي والنومة تحت الشجرة هي هي والصداع آخر اليوم هو هو.
والحلفان الكدب اننا مش هناكل فسيخ تاني هو هو شم النسيم هو الاجازة الوحيدة اللي ملهاش دعوة بحكومة ولا قرار هو اجازة الشعب للشعب يوم بنسيب فيه الموبايل والهم والخناق والسياسة ونفتكر اننا بنعرف نفرح وان الدنيا لسه فيها شمس وخضرة وضحكة ولمة وان البسيط ممكن يبسط وان التاريخ مش لازم نقراه في كتب ممكن ندوقه في لقمة فسيخ.
الخلاصة شم النسيم مش يوم عادي ده بطاقة تعارف بينا وبين أجدادنا واثبات اننا لسه شبههم بنحب الحياة وبنحتفل بيها على طريقتنا حتى لو الطريقة دي بتتعب القولون بالليل بس بتريح القلب طول السنة.
