الخلع بالـ (جنيه الصوري).. مبروك أخدتي الحكم، بس تقدري تحلفي على المصحف إنك مش مراته؟!”
افرحي بالخلع اللي بـ(جنيه صوري).. بس اسألي نفسك الأول: هل الحكاية انتهت فعلًا؟
الخلع مش مجرد ورقة رسمية بتطلعي بيها من باب المحكمة وانتهينا… لأن قضايا الخلع والطلاق بتمس “ميثاقًا غليظًا” بناه ربنا سبحانه وتعالى بين الزوج والزوجة، ووراء الورقة دي حقيقة، ومسؤولية، وتبعات تانية خالص!
تخيلي معايا المشهد ده:راجل راجع من شغله، عايش مع مراته في بيته بشكل طبيعي جداً… وفجأة وبدون أي مقدمات تقف قدامه وتقول له:”اطلع بره… أنت بقيت محرم عليّا، أنا خلعتك!”
هنا الصدمة بتبدأ… لأن فيه فرق كبير جداً بين حكم صدر في المحكمة بناءً على أوراق، وبين حقيقة الإجراءات اللي اتبنت عليها الدعوى دي.
وعشان الخلع مايبقاش مجرد حبر على ورق، فيه نقطتين لازم يتراجعوا كويس:
١- لغز مقدم الصداق (المهر) تروحي تدفعي “جنيه صوري” في المحكمة… وإنتِ في الحقيقة واخدة شبكة، ومهر، وتجهيزات للبيت بشيء وشويات؟
السؤال هنا: هل الجنيه المكتوب في عقد الزواج هو فعلاً المهر الحقيقي اللي اتدفع؟
تخيلي كده عريس داخل يتقدم ويقول لوالدك:”يا عمي أنا جايب مهر جنيه!”فيرد والدك بابتسامة:”موافق يا ابني… الجنيه ده يكفي ويزيد ويأمن مستقبل بنتي!” أكيد لأ!
لأن رد الحقوق يكون على الحقيقة، وليس مجرد رقم مكتوب لإنهاء الإجراءات.ولو عاوزة حكم خلع صحيح… يبقى الطريق الصحيح هو تنفيذ الحقوق كما أمر الشرع.
٢- لعبة “الإعلان الوهمي” أو المضروب الإعلان مش إجراء شكلي بنمضي عليه في الدفاتر ونمشي… ده حق أساسي للخصم إنه يعرف إن فيه دعوى مرفوعة ضده عشان يقدر يدافع عن نفسه.
والزوجة تخطئ إذا تعمدت إخفاء دعوى الخلع عن زوجها، أو ألقت الإعلان على عنوان قديم أو غير صحيح للحصول على الحكم بسرعة ومن غير علمه.
لأن الزوج مش غائب عن المشهد…
وبذكاء قانوني بسيط، محاميه يقدر يبحث، ويطعن، وإذا ثبت وجود تلاعب أو إخفاء متعمد للعنوان تبدأ نزاعات قانونية جديدة.
الخلاصة:إذا تحايلتي على القانون والمحكمة بورق غير صحيح أو بيانات غير حقيقية عشان تاخدي حكم خلع… فهل هتقدري تتحايلي على ربنا؟
إزاي هتكوني مرتاحة وإنتي في الحقيقة ما ردتيش للزوج حديقته كما قال رسول الله ﷺ:”رُدِّي عَلَيْهِ حَدِيقَتَهُ” فالخلع له طريق… وله حقوق… وله أمانة.
والتحايل على القانون ثمنه غالي في الدنيا… والإنسان مسؤول عن أفعاله أمام الله.
والسؤال هنا ليكم وعايزة أسمع رأيكم في التعليقات:هل هتكوني مرتاحة وإنتي عارفة إنك أخفيتي الحقيقة أو تحايلتي في الإجراءات؟
ولو اتجوزتي مرة تانية… هل هتكوني مطمئنة إن البداية الجديدة اتبنت على طريق صحيح؟ “
لو خلعتيه بـ (إعلان مضروب) وفرحتي بالحكم.. فكرتي فـ (الجوازة التانية) هتبقى حلال!
